揀喺今年生日 (7月28日) 當日宣布加盟英皇娛樂嘅陳慧嫻 (Priscilla)，嚟緊大家又可以睇到佢精彩演出，一向勤力嘅佢今次全面發展內地市場，參加音樂綜藝節目《中國夢之聲·我們的歌》第四季。
慧嫻將會同新生代歌手一齊改編金曲，歌迷都期待聽到佢多首經典金曲，好似《千千闕歌》、《人生何處不相逢》、《傻女》。慧嫻日前喺社交平台分享1989年演唱會上《千千闕歌》白紗裙經典造型嘅自畫像，又有紅衣造型舊相，80年代味道返晒嚟！網友直呼：「夢回《千千闕歌》現場」，非常期待慧嫻在節目中嘅表演。
身處內地拍攝節目嘅慧嫻話，今次演出唔止係與熱愛音樂嘅觀眾分享自己故事，更係通過與新生代歌手合作，嘗試演繹更加新鮮、更具挑戰嘅音樂，向觀眾展現自己嘅音樂世界。
英皇娛樂高層霍汶希（Mani）亦好重視慧嫻嘅節目拍攝情況，佢喺社交平台post探班時與慧嫻嘅合照，Mani話：「終於見到我們的歌后陳慧嫻Priscilla了，這也是我們第一次見面，聊得很開心，期待狀態滿分的陳慧嫻超話 在《我們的歌》4中演繹更多好聽的歌」。慧嫻就回覆話「彩排中收到的意外驚喜！聊得很開心」。
Photo / 大會提供
