香港文匯報訊（記者 梁靜儀）草蜢與鄭欣宜（Joyce）和湯令山（Gareth.T）前晚（4日）一齊上音樂節目《Chill Club》，分別Crossover 演唱《怎麼天生不是女人》和《一加一加一的愛》，原來今次邀請合作全是蔡一智（阿智）的私心。

相隔多年，草蜢與Joyce再度同台合唱表演，蔡一智說：「早前睇咗Joyce紅館演唱會，好感動，佢嘅台上光芒愈來愈勁，而今日邀請佢同我哋合唱之餘，我係有私心，好想現場欣賞佢表演新歌《GLITTERFALLS》，剛才睇到佢又唱又跳，好精彩。」Joyce表示感謝之餘，亦很開心可以跟草蜢哥哥Crossover他們的《怎麼天生不是女人》。作曲的蔡一傑就笑說：「真識貨！」

至於來自美國伯克利音樂學院的Gareth.T，阿智聲言以他為努力目標：「Gareth.T返嚟香港後，為樂壇好多歌手寫咗好多好作品，我好留意佢，尤其是佢來自嘅音樂學院，係我好仰慕嘅學院，我希望退休後可以去讀。」傑仔就笑指哥哥阿智妄想。

今次合唱，Gareth.T花了很多心思，在眾多草蜢金曲中挑選合唱《一加一加一的愛》後，還主動參與新編伴奏部分，他說：「我好鍾意呢首歌嘅小提琴伴奏部分，好有法國風味。」原作者阿智好感動地表示，寫歌的時候就是想帶出法國情懷。傑仔則說：「雖然呢首歌係多年前嘅作品，但我哋好少公開演唱，今次因為Gareth.T而表演，難得好機會。」蘇志威建議新編曲版本加入他們10月紅館演唱會的歌單內。