環球經濟唔明朗，唔少大孖沙投資者都對後市唔樂觀。其中「玩具大王」蔡志明話，依家歐洲最壞嘅消息仲未出晒，下半年入市要小心。另外科達地產主席湯君明亦認為，今年底前樓市仍有變數，唔少一線舖租金相信已「見頂」。蔡生仲話，佢旗下KCP九龍城廣場都有基金「敲門」洽購，出價30幾億元，不過，佢話依家無諗過賣。
歐洲經濟時好時壞，唔少分析師都話入市時要小心，劉Sir專登搵咗有「撈底王」之稱嘅旭日國際主席蔡志明取經，佢話過去幾個月外圍經濟有唔少負面新聞，好多仲未浮出添，所以下半年入市時要「三思而後行」，被問到幾時撈底入貨，佢笑笑口話：「唔好心急，依家仲未係時候。」
蔡生話，雖然個市好多變數，不過，近期基金好活躍，頻頻問盤，好似佢○八年斥約15億元，向摩根士丹利等購入嘅KCP九龍城廣場，依家有基金話想買，涉資30幾億元，另一基金就話對荃灣豪華廣場全幢有興趣，積極問盤，不過，上述兩項物業，佢都話唔想賣，原因係低息環境下，賣咗套現無用，不如收租。
湯君明：一線舖租見頂
另資深投資者湯君明亦同劉Sir講唔睇好下半年樓市，佢話依家樓價好貴，相信短期難免要調整吓，而一線舖租「貴到飛起」，甚至已經見頂，不過豪宅就好啲，抗跌能力較高。至於半年前叫價6億元嘅黃竹坑科達設計中心，佢話依家有基金畀6.6億元洽購，升幅近一成。另旺角美觀大廈樓上同地舖都各有客傾，加埋大約2.2億元，相信好快有好消息。
另外，「舖王」鄧成波啱啱用2.18億元買咗早前已獲批酒店圖則嘅荔枝角綽榮商業大廈，中原林嵐話，幢樓批則可提供153個房間，以成交價計平均每間房房價大約143萬元，原業主持貨四年，帳面袋差唔多8,000萬元，賺幅近六成。
蔡伯能摸舖速賺262萬
又有代理爆料，舖壇老手蔡伯能上月以5,738萬元，向發記甜品以摸貨形式買入嘅銅鑼謝斐道440號地下C2舖，啱啱以約6,000萬元摸出，不足一個月帳面即賺262萬元，賺幅近半成。
劉Sir
App下載
