佘詩曼 生死禍福
有些時候，佘詩曼會變回那個五歲女孩。
那一年，她父親離世。
當時她個子小，在喪禮上跕着腳也看不到棺木內的父親。
「我唔夠高瞻仰遺容啊，點解你哋唔畀我睇呢？我一路都擺喺個心入面，但我冇出聲。」她回想。
慢慢長大了，她才明白這叫遺憾。
「我唔鍾意後悔，但嗰一刻我冇得選擇。」
直至十多歲時，媽媽告訴她，「因為係撞車，所以對容貌有影響，我哋唔想畀你睇，怕你驚。嗰一刻我就放下喇，同埋我好感激佢哋，即係可以喺一秒之間，成個人嘅思想唔同咗。」
自此她知道事情有兩面，她要選擇快樂光明那面。
那個五歲女孩長大了，內心健壯，媽媽一直是她的心靈支柱，然而至今偶然她心底會浮現一絲恐懼，擔心媽媽有一天會離去。
「突然間一下咁樣，跟住就眼濕濕，第二刻我就同自己講：『喂，唔好咁諗啦，而家又唔係有嘢；同埋就算有嘢，都係咁㗎啦，一定會有呢個moment㗎。佘詩曼，唔該你prepare！盡量希望唔好畀自己覺得係一個咁大嘅打擊。』」
【媽媽曾病危】
生死禍福，無人能定。
除了父親離世那一天，她跟哥哥、弟弟沒見過媽媽哭。
「做人堅強係學我媽咪嘅，我睇住佢點樣湊大我哋，一個女人可以做到咁樣， 其實好唔容易，佢從來冇埋怨，唔會話『我好攰呀』、『你哋唔好嘈啦』，一句都冇鬧我哋，冇喊過，我唔知匿埋有冇，總之喺我哋面前係冇。」
佘媽在70年代曾任港台DJ，喪夫後，一直母兼父職。
「就算我哋以前試過有一段時間，環境唔係幾好，媽咪會盡量做到佢應承過嘅嘢。」
2005年，身在美國的媽咪突然入院，當時佘詩曼於內地出席頒獎禮，再次讓她覺得跟死亡很近。
「佢個肺有氣泡，要抽返出嚟，但係細菌感染好嚴重。佢身邊嘅人突然間打電話嚟，話佢類似已經七孔流血，即係內出血，好得人驚，有成20秒係停止咗呼吸，就係喺我出席頒獎禮嘅時候話畀我聽。好難過嗰晚，覺得點解唔帶埋passport出嚟呢？」
幸好媽媽很快康復，自此佘詩曼決心多陪媽媽。
「我陪到都陪，好多嘢返唔到轉頭，希望唔好做令自己後悔嘅事。」
【有愛有錢也不足夠】
有些人有錢便快樂，有些人被愛便滿足，但她需要更多。
要享受少奶生活，其實她大學畢業時已可以，當時她在瑞士讀酒店管理，有一個家境富裕的台灣男友。男友帶她回台灣，住了兩、三個月。
「頂唔順，唔知喺度做乜。佢哋對我好好、好錫我，十指不掂陽春水，乜都唔使做，好悶好悶。冇嘢做，日日出去洗頭，按摩洗頭搞兩個鐘頭，你諗下連頭都唔使自己洗，仲做咩呢？我覺得我廿二歲咋喎，讀完書一世就咁過？唔係啩。」
佘詩曼走自己的路，現在擁有的一切，全是自己賺回來。
「咁梗係啦，你點可以依賴人哋畀你嘅啫，你自己去得到、去爭取嘅先有價值。過程係最緊要，過程係好享受㗎嘛，即係嗰種想擁有、奪得嘅感覺。」
大約二十年前，她曾認為擁有五千萬，便有足夠安全感。
「其實諗返都覺得好好笑，嗰陣時拍劇好辛苦，我同個對手講：『你覺得你要有幾多身家，先會退休唔做呢？』跟住佢話要計一計。」二人拿着電話，一起很認真地計數。
於是她拼命搵錢，有次她只得一個半月的檔期，但堅持接拍30集電視劇，創下直踩五日四夜的紀錄。
有指她現擁有四個物業，總市值逾億，目前工作不再純粹為錢。早於2002年，佘詩曼已儲到第一個一百萬，當時滿心歡喜。
「就喺度諗，好勁呀，搵到一百萬。我下一個目標係三百萬，又得咗喎，跟住一路加落去，我太幸福。我覺得做人要有目標，同埋千祈唔好放棄，我都有低潮嘅時候，但我從來都唔放棄。」
【離巢初期遇低潮】
她所指的低潮，是離開TVB初期。
「咁多年嚟都係好密集式嘅拍攝，一年四、五部劇集，但當我走咗出嚟之後，一年只係拍咗一部戲，我即刻自我價值貶低晒。冇人搵我拍戲嘅，死啦，唔鍾意睇我，懷疑自己嘅能力同埋市場價值。」
她曾經迷失，「唔想郁，又唔出街又唔見人，頹廢、好負面，因為真係接受唔到，突然間靜晒。好驚呀！點解會咁嘅，係咪行錯咗啊？」
後來她看了一本書，叫《The Magic》，「佢係有一個練習要做，為期28日，每一日教你如何感恩，佢教你喺唔好嘅情緒上都感恩。嗰陣時好難，但我做完之後，成個人唔同晒。」現在她凡事感恩，反而多了一份力量。
她會記得對自己好的人，幾年前有一名劇務退休，她不但現身退休宴，更送上份量十足的金鏈給他，成為電視城佳話。
「我真係有送禮物畀佢，因為有一次出外景，佢幫我拎外景櫈，睇唔到路，仆親，爆咗幾隻牙。我一路記喺個心入面，我好唔舒服，同埋佢一路都對我好好。」她慢熱，但內心很溫暖。
【人生沒遺憾】
不經不覺，她已入行廿六年。
如果要跟初出道時期的自己說一句話，她會講：「好彩你冇放棄咋！」
為事業，她放棄過多段感情，今天的成績得來不易。
「冇時間呀，因為其實好多『圈中人』係唔會明囉。食餐飯都冇時間，你係咪避我啊？唔鍾意咪講囉，唔使咁樣嘅。食餐飯都冇時間邊個信啊，但我真係瞓都冇時間。如果真係有時間，我寧願瞓呀！佢哋唔會明，亦未必會體諒。拍拖要一齊，陪伴同埋分享，我都做唔到。」
決定了，她便不後悔，活到今天，人生沒遺憾。
「真係冇乜，有時可能係錯，我都會照做，可能係搞到自己嘅啫。我自己hurt或者自己唔開心，但我考慮得好清楚，呢個係媽咪教，think before you do。」
現在是她的收成期，「有鍾意嘅劇、戲，咪拍囉。如果唔鍾意嘅，咪唔做，抖下玩下。」
演員是她的終身職業，「演阿媽阿婆，我都會演，咩階段咪演唔同角色囉，都可以精彩㗎。」
怕老嗎？
「梗係怕啦，點會有女人唔怕老㗎，你會喺電視機度見到自己，已經唔係骨膠源滿滿嗰個自己。冇辦法，一定要接受，一定要克服咗佢，如果唔係，你就會好唔開心囉。」
她覺得要相信，自己每一個階段都可以發光。
「你唔好理我發幾光，同埋喺邊度發，就算我自己喺個廳度唱卡拉ok，我都可能可以好似喺紅館咁嘅。你要話畀自己聽，你個存在價值係有喺度，而唔係你面上嘅皺紋。」
懷着信心去看，你會見到盼望。（文章未完，請睇留言。）
撰文：Dvora
攝影：凍檸茶
攝錄：Max
化妝：Katherine Lo
髮型：Lorraine Lam @ Hair Culture
服裝：Celine
造型：Christina Hsu
場地：W Hong Kong
