網上購物興起多年，好多人都識得去網購平台買平嘢，唔少商家亦都急起直追發展網購，偏偏價值不菲嘅珠寶同鐘錶好難發展網上業務，事關消費者驚買到假嘢。做珠寶生意嘅中西區區議會前主席胡楚南最近就小試牛刀，將價值二百幾蚊嘅手鏈產品放上網購平台賣，結果大賣，十分振奮人心，難怪佢話今年要大力拓展網上市場啦。

潮州商會尋日舉行新春團拜，卓妮同唔少名人講起新年大計。胡楚南一提起發展大計就笑笑口話有好消息，因為佢聽細仔建議，呢個月初第一次將去年公司慶祝周年活動時嘅純銀鍍金手鏈紀念品放喺網購平台賣，售價二百蚊人民幣有找，即係二百幾港元，估唔到幾個鐘就大賣二千幾條。佢話公司只有千幾條存貨，要拿拿聲從意大利訂貨返港喎。

鍾情鑽研傳統歷史文化嘅長春社文化古蹟資源中心理事胡炎松就計劃今年重返校園，修讀歷史文化博士。佢話自己原本係讀土木工程，畢業多年，最近得閒啲，所以想讀番書。由於佢好喜歡研究非物質文化遺產等歷史文物，所以同幾位相熟嘅教授傾過，大家都支持佢，希望今年年中可以成事。

同場仲有「小巴大王」馬亞木同兒子馬僑生、中華總商會會董張俊勇、蓬瀛仙館副理事長林赤有等人。潮商會長胡劍江因為到深圳公幹，為三月初到北京開兩會做準備，所以冇現身，由今年九月即將接棒做會長嘅現任副會長林宣亮代表招呼賓客。林宣亮話，希望上任後做好承先啟後嘅工作喎。

卓妮