唔想再錯過欣賞禾雀花的黃金時間，今年𥄫實花見情報，特別走到花氣最盛的元荃古道，目標完美達成。睇埋下花山的獨特標高柱，收獲好豐富。
行程：
荃灣港安醫院 ＞元荃古道 ＞禾雀花 ＞下花山 ＞元荃古道 ＞荃灣港安醫院
元荃古道（Yuen Tsuen Ancient Trail）起點喺港安醫院巴士站對上。開步後持續上斜，部份路段斜度較大。如果平日少做運動，行上去會有啲辛苦。不過，停吓唞吓慢慢行，問題不大。
賞禾雀花必經 577 級樓梯
沿綠色欄杆石屎路上山，走過 577 級樓梯，橫過引水道，接返綠色欄杆樓梯再上斜。到分岔路口，左右兩邊都有元荃古道路牌，挨住有綠色欄杆的左路直上，唔走右路。行多一陣，禾雀花出現啦。
網友形容元荃古道的禾雀花最茂盛，置身現場感覺似入咗個禾雀花林。一串串的禾雀花變身特大提子垂吊空中，好誇張。有幸親近咁特別的鮮花，快樂指數滿分，啲花真係好似雀色咁得意，望住佢哋唔捨得走。
下花山有極開揚荃青區全景
沿步道上行到十字路口，穿過右邊的涼亭，轉踏黃泥山徑下花山（Ha Fa Shan）。山徑既明顯亦易行，唔使三個字就登頂，超快喔。除咗大帽山，面前有極開揚的荃青區全景，藍巴勒海峽風光好搶眼。
下花山標高柱唔係常見的黑白圓柱體，旁邊仲有一支「長針」，點解呢？
過去離標高柱冇幾遠的大石群位置，依右邊小路落山。斜路略崎嶇，全沙石地，易跣腳。喺出口轉右走，接回元荃古道，返落去港安醫院巴士站。
***
留意：
- 山徑冇垃圾桶，自己垃圾，自己帶走，實踐行山禮儀。
- 行經村民住所時請保持安靜。
- 唔想行跣腳小路離開下花山，可原路折返涼亭，走舊路落港安醫院。
- 落山小路唔止一條，睇住地圖確保冇行錯路。
- 完成行程時間：2 小時
🚏 🚌 🚏 🚌 🚏 🚌 🚏 🚌 🚏 🚌
交通：
巴士 30, 30X, 39A, 39M 到荃灣港安醫院站，落車後向車頭行少於一分鐘，登綠色欄杆樓梯進入元荃古道。
