搳港大女篮事隔14年再次夺冠，胡楚南都好戥佢哋开心。
胡楚南（中）同范启蓉（右）、彭晓欣等一齐重温昔日篮球队员合照。
【今日时报网讯】记者李嘉倩、谢巧玲报道：今年嘅大专盃女子组篮球比赛，香港大学以57：55险胜，打破香港中文大学六连霸梦，是港大女篮事隔14年再次夺冠。一直有赞助港大体育队伍的胡良利(万益)珠宝行董事长胡楚南都好戥佢哋开心，日前豪请港大女篮全队队员到上环食日本料理庆祝。胡楚南对小记讲：「今日上午仲发紧烧，下午睇完医生打完针，点知一来到就无晒事喇!」佢话见到班年轻篮球员精神晒甘话，成晚同后生打成一片，仲同餐厅职员分享：「佢哋好犀利，攞咗冠军。」
翁Sir谦指「天时地利人和」
见教练翁Sir亦有到场，小记当然心思思想问下佢有咩夺冠秘诀啦，毕竟港大虽然亦曾多次入围四强，但已多年未曾问鼎，佢担起港大女篮教练大旗不过三年就有甘好成绩。佢就谦虚指系「天时地利人和」喔，「个训练模式系有改变嘅，有针对性咗，体能上面有进步，亦有参观训练营，睇下人哋嘅训练方法，将学到嘅知识套用喺球队度，队员们明白到，亦执行得到。」
佢将夺冠功劳归于全队努力，话班队员读书好，打波又叻，自我管理能力强，好注重团队甘话喔。佢亦透露，本届会有9位队员毕业，可以用冠军成绩为最后一年嘅大专盃比赛收尾，都算系完美落幕啦。
范启蓉赞胡生系有心人
领队范启蓉当球员期间已认识胡生，佢大赞胡生系有心人，「胡生一直都好支持香港大学，亦好支持篮球队，除咗固定每年赞助港大体育队伍外，喺很多活动同联欢入面都有赞助奖金奖品」，佢向记者提起世博期间，胡生亲自担任领队，带领70多人到上海交流，并促成上海集训。
曾为中西区区议会前主席的胡楚南，一直热爱文化、艺术同体育，更身体力行，经常大力支持。当日佢带咗历届女篮队员嘅合照同上海集训照，让大家一起重温，「呢两个相框我一直放喺公司，今次专登带埋过来同大家分享。」胡生真系认真念旧。
为「最后一年」而战嘅彭晓欣感谢教练同队友三年来嘅相互扶持，记者对篮球「十窍只通咗九窍」，但佢都好有耐心，分享咗好多篮球知识同自己嘅感想，「呢三年我哋都无off season过，每个礼拜都有练习，比赛可以得到这个成绩，我哋嘅努力好重要。」
这次聚餐既温馨又热闹，胡楚南最后不忘说：「年轻人有活力，又健康，同佢哋一齐，自己都觉得自己后生啲。」
下一篇：：湘港澳人力资源服务协作签约