城中鏡：潮人外遊無時停
潮州商會同汕頭商會早前同日搞團拜。講開新春前後嘅旅遊大計，好多「家己冷」都有出行，好似潮州商會會長張成雄同兒子張俊勇，啱啱去完奧地利旅行回港，張成雄嚟緊又會親自帶隊去陸上絲綢之路，考察西安等地，而汕頭商會會長葉振南喺農曆年前，就到英國倫敦探望讀書嘅愛女。
張成雄嚟緊會親自帶隊去陸上絲綢之路考察。
葉振南（左）去完倫敦探愛女返港過年；右為中西區民政事務專員黃何詠詩。
陳有慶（右）同張詩培出席潮州商會團拜聚首。
張俊勇話去到奧地利聽聞當地早前發生雪崩，好在佢哋去到之後，冇發生乜嘢事，只係女兒滑雪時跌傷腳，小腿骨附近有條大約頭髮絲粗度嘅裂痕。問佢點解唔好好照顧女兒時，佢就話自己都有受傷，但只係跌傷咗隻腳趾啫，真係唔知好嬲定好笑。
張成雄就話嚟緊會親自帶隊去陸上絲綢之路考察，包括甘肅、新疆等地，一直向西行，預計約五十人參加。
加深認識一帶一路
張成雄話早幾年好多人去星馬泰，而近期就興講一帶一路，但莫講話逐個地方名數出來，好多人連呢啲地方喺邊都唔知，所以認為應該要帶大家一齊去考察，加深吓認識喎。同場仲見到潮州商會名譽會長兼民政事務局前局長藍鴻震，講起近日好多人自稱「本土」，佢就話潮州人喺香港超過一百年，講本土，潮州人認第二，就冇人敢認第一喎。
汕頭商會方面，一班成員亦齊齊出席團拜，包括會長葉振南、榮譽主席陳有慶、常務會董張詩培同會董陳永豪等。
葉振南話新年去完倫敦探望愛女後，就喺農曆年前趕返香港，呢幾日都忙於向親友拜年，而佢個仔舊年結婚不久，除咗多咗新抱呢家人一齊過年，佢仲好希望快啲抱孫添！
