啱啱過咗農曆七月，根據傳統潮州人習俗，整個七月都係鬼門關大開嘅日子，大大小小嘅盂蘭勝會同祭祀儀式都會出現喺大街小巷同球場上。潮州商會前日舉行新一屆會董會交接儀式，見到負責保育及研究盂蘭節文化嘅會董胡炎松，佢除咗有出書講解盂蘭節習俗嘅由來外，最近亦有帶學生參加導賞活動，去西貢戲棚了解神功戲運作過程同意義。

劉文文（右起）與弟弟劉文東及其太太Sanis關係非常融洽。

胡炎松最近帶咗班學生去考察盂蘭勝會傳統習俗文化。

張成雄（左）九月接棒做潮商新會長，同兒子張俊勇父子檔拍住上。

雖然香港潮州人盂蘭勝會被列入為第三批國家級非物質文化遺產名錄，但胡炎松話要傳承落去並唔容易，好似好多在儀式中負責誦經嘅師傅，有時只係知道咩時辰要唸乜嘢經文，但就唔清楚背後嘅意思同點解要咁做喇。佢又話好多人對神功戲有誤解，例如首場唔係畀鬼睇，其實場場都係畀人睇嘅。

劉文東自爆唔識潮語

講番當晚會董會交接儀式，一眾新舊成員齊集商會總部潮州會館，好世界飲食集團董事總經理張成雄將於九月接棒成為新任會長，同兒子張俊勇繼續父子檔効力商會。同場仲有啱啱同囡囡去完馬爾代夫及沖繩旅行嘅會董蔡敏思，見佢曬完之後皮膚依然冇乜點變黑，果然護膚有法。

同屬「潮人」嘅香港吸煙與健康委員會主席劉文文，佢就以會董身份同弟弟劉文東及弟婦Sanis一同現身，雖然佢哋都係潮州人，但劉文東就自爆唔識講潮州話，好在有個識做嘅太太，結婚時練咗一句秘密武器，用潮州話同奶奶講「我要做個好新抱」，氹到奶奶好開心，笑到見牙唔見眼。當晚見佢哋三個攬頭攬頸咁親密，就知一家關係一定非常融洽啦！

第一手消息請下載on.cc東網iPhone/iPad/Android/Windows Phone Apps