本文重點
已故華懋集團主席「小甜甜」龔如心千億爭產案裁決在即，華懋掌舵人龔仁心對贏官司充滿信心，不但將華懋集團總部搬返去荃灣如心廣場，並結束行醫生涯重返華懋，前晚平安夜又同太太劉元春、妹妹龔因心一齊出席喺如心廣場露天廣場舉行嘅「舞動荃城迎聖誕」活動，仲上台同荃灣區議會主席周厚澄等嘉賓合照，完全以主人家身份擺出勝利姿態。
如心廣場成荃灣地標
前晚龔仁心同龔因心不約而同着咗紅色衫出席迎聖誕活動，見到龔仁心嘅心情勁靚，喺台下同太太有講有笑。當晚大會安排咗精彩又緊湊嘅舞蹈表演，包括西班牙舞、巴西舞、俄羅斯舞等，又有多位歌星獻唱、連串勁歌熱舞同緊張嘅倒數環節，連帶台下嘅龔仁心夫婦、龔因心同華懋集團老臣子吳崇武都興奮到揮動同敲打吹氣棒熱鬧一番。
如心廣場依家稱得上係荃灣地標，新界鄉議局近年都喺嗰度搞新春團拜酒會，最近龔仁心更加喺如心海景酒店大排筵席娶新抱，喺家姐龔如心命名嘅地方搞婚宴，別具意義。