中環出更：許榮茂籌一億捐助新移民
由內地房地產首富、世茂集團主席許榮茂同恒基地產副主席李家傑牽頭嘅「新家園協會」，尋日舉行成立酒會，主要服務對象係內地來港未滿七年嘅香港居民。人說為善最樂，許榮茂成晚好開心，因為商界老友熱烈響應捐錢，令協會一成立就籌足一億元，當中好多都係內房股老闆，個個閒閒地數以十億百億計嘅身家，尋日大家齊齊亮相，場面好墟冚！
揼內房股老細心口
啱啱卸任百仁基金主席嘅四叔大仔李家傑，原來同許榮茂好老友，連做善事都拍住上，佢哋兩位帶頭捐出一千萬元，許榮茂做會長，李家傑做監事會主席。許榮茂話畀卓妮聽，佢親自打電話揼老友心口，估唔到班老友反應熱烈，個個慷慨解囊一千萬而唔係一百萬，於是佢加碼捐二千萬湊夠一億元。
一眾拍心口捐一千萬元嘅另外七間企業老細，包括恒大地產主席許家印、富力地產董事長李思廉、雅居樂主席陳卓林、渝港國際主席張松橋、福山集團主席王力平、中洲集團董事長黃光苗同京基集團董事長陳華。除咗陳卓林之外，個個大老闆尋晚都現身打氣。
至於點解有咁多股民熟悉嘅內房股老細捐助，許榮茂笑謂：「朋友支持啫！」李思廉都話，佢入會係撐許生喎！
好多政商界名人尋日齊撐場，好似中聯辦主任彭清華、新鴻基地產非執董郭炳湘、行會成員鄭耀棠、立法會議員葉劉淑儀、工聯會副會長陳婉嫻等。該協會喺港島已開設服務處，地點喺福建幫票倉北角，嚟緊會喺九龍新界各開多兩間，為新移民服務。嫻姐平時做好多新移民工作，聽到新家園一出世就有一億元水頭射住，都感到驚訝，但佢忍唔住踩政府，話政府對新移民嘅支援只靠民間力量唔夠喎！
卓妮