本文重點
人稱「中國高球之父」嘅觀瀾湖創辦人朱樹豪（David），尋日獲頒高球界諾貝爾獎，卓妮都去湊熱鬧。全球最權威嘅美國職業高爾夫巡迴賽（PGA TOUR），宣布以朱樹豪嘅名命名「朱樹豪獎」。David攞獎不忘展示「特訓成果」，同大公子朱鼎健（Ken）及細仔朱鼎耀（Tenniel）呢兩位得力助手上台分享榮耀。Ken朱笑言喺父親嚴厲鞭策下，從小習慣喺壓力中成長，令佢明白想賺錢就要凡事親力親為。
特訓國家青年軍
David朱獲獎，朱家上下興奮到極。Ken朱因為事忙，未有時間買禮物賀爸爸，不過David朱比阿囝更忙，尋日領過威水獎狀後，隨即飛往北京，睇吓二○一六年奧運加入高球項目後，國家要爭取金牌，有咩可以幫到手。David朱話，觀瀾湖一直係中國高球培訓基地，正全力特訓一批青年軍，又支持國家及廣東省青少年隊喺觀瀾湖進行培訓，中國第一位奧運跳水冠軍周繼紅嘅囝囝，都係成員之一，話唔定呢班少年軍十年後為中國攞番面奧運高球金牌呢。
Ken朱都唱雙簧話，高球講求機智同EQ，好適合中國人玩，相信不久將來中國肯定會出現世界級高球手。兩父子講嘢口脗咁夾，皆因Ken朱深得爸爸真傳，九五年由加拿大西安大略大學畢業返港後，即接掌家族生意，依家主力負責投資及產業發展。至於細佬Tenniel喺加國多倫多大學讀完經濟，再深造高球管理碩士，現時主力高球發展，兩兄弟拍住上，將觀瀾湖搞得有聲有色，David朱總算飲得杯落囉！
卓妮